Tag der Muttersprache: Dä Schudz vom Weldärbe hod obäsda Brioridäd

Redagdsion

Dä Hibbie sächd, däss sich ollä anich woan bei dära Bodiumsdisgussion im Februa in dä VHS. Wu er däs na her hodd, worä doch gor ned dabai …

A Middailung vom Hibbie

Dä Schudz vom Weldärbe hod obäsda Brioridäd

„Dooch dä Muddäschbrooch“ 21. Februar 2014: Des Zendrum Weldärbe dangd dennä Bürchä auf fränggisch

Bamberch – vom Griech verschoond, vom Stodtrood ned.“ – Des Schbrüchla vom Mundoäddichdä Gerhard C. Krischker hod sich des Zendrum Weldärbe Bamberch ausgsuchd, um om Indernationooln Dooch dä Muddäschbrooch, dem aanäzwandsigsdn Februar alla zä dangn: aanä jedn Bamberchera un an jedn Bamberchä, alla Bürchävereine, denna Schudzgemeinschofdn un Heimadvereine, die wu sich füä den Ähold des Weldärbes „Oldschdodd vo Bamberch“ einsedzn dun.

„Es is fasd allaans dem Einsodds vo denna Bürcherinna und Bürcher zuzäschreim, dass in denna sibbzichä und ochzichä Joäh zohlreicha Häusä, die heud ols Aanzldenkmool bezeingd wän, ned obgerissn woän sänn“, sochd dä Bürchämassdä Werner Hipelius, Kulduärefärend dä Schdodd Bamberch. „Ich ko mich nuch guud on des Gschdreid um den Ähold vo so monchm Gebäude ärinnän, beischbielsweis des Olda E-Werg, des is heud die Volgshochschuul. Dä Einsodds dä Bürcher hodd domools zum Umdengng im Schdodtrood gfüähd. Des Deema Denkmolschudz is heud a zendrols Onlieng vo dera gesamdn Schdodtgsellschofd“, so dä Hipelius.

Des hom alla ghöäd, die im Februar bei dera Bodiumsdisgussion däbei woän. Doäd hom die Aanzlna vo alla Badein des gleicha gschmadd, alla hom die Bedeudung vom Weldärbe un den Schudz vo Bamberch bedoond. Und so isses a beim gebloondn Ausbau dera ICE-Stregg: „Die Bürchä un dä Schdodtrood sän sich einich, dass dä Schudz des Weldärbes und dä Leud, die wu on dä Stregg wohna, obäsda Brioridäd hodd.“

Dä Indernationoole Dooch dä Muddäschbrooch is a Gedenkdooch vo dä UNESCO, des is a Kulduäorganisation dä Vereindn Nationa, un soll zuä „Föäddärung schbroochlichä un kuldurellä Vielfold und Mehrschbroochichkeid“ diena. Deä find seidm Joäh zwaadausnd jeds Joäh immä om aanäzwansigsdn Februar schdodd.

Schreibe einen Kommentar

Deine E-Mail-Adresse wird nicht veröffentlicht.